Catarman, Northern Samar – Presente nga nag-aandam an gobyerno probinsyal sa pakipagbuligay sa magkalain-lain nga sektor, para sa pagsalin-urog san ika-44 nga anibersaryo san probinsya.
An mga aktibidades para sini nga pagsalin-urog mao in pagtitikangan sa Hunyo 15, 2009 ngan ini in magtatapos sa Hunyo 19, an kaadlawan san probinsya.
Sugad san nahigaraan, magkakayaon sin Agri-Trade Fair nga madalagan tikang sa Hunyo 15 tubtob Hunyo 19, 2009. Sa gab-i san nasabi nga adlaw, paghihimuon an Cultural Night ngan sa Hunyo 16 nga gab-i man liwat, pagbubuhaton an variety show. Ini nga mga aktibidades in paghihimuon sa sentro san bungto san Catarman nga mao sa Sacred Heart Plaza nga atbang san Catarman Cathedral.
Sa Hunyo 17, magkakatitirok sa Ibabao Hall an mga coconut farmers para san selebrasyon san Coconut Stakeholders’ Day ngan sa Hunyo 18 ngan 19 nga gab-i naman, magkakayaon sin Boxing Tournament sa Capitol grounds.
Sa Hunyo 19 san aga, an adlaw san pagkatindog san probinsya, magkakayaon sin concelebrated mass sa Ibabao Hall san Kapitolyo, diin sayo nga pamahaw kahuman san misa an ginpipreparar san pamunuan ni Gob. Raul Daza para sa ngatanan nga maatendir san misa.
Kasumpay sini, gin-iimbitar an publiko nga makigsayo sa gobyerno probinsyal sa pagsalin-urog san ika-44 nga anibersaryo san Norte san Samar pinaagi san ira pagpartisipar o pagtambong sa mga pakiritaon o aktibidades nga nakalinya para sa mao nga okasyon.
Kun manunumduman, an Norte san Samar in nagin probinsya san tuig 1965 san an isla san Samar in ginhimo nga 3 nga probinsya san Western, Eastern ngan Northern Samar.
